A RESURRECCIÓN DE BRUGUERA
A vella Editorial Bruguera resucita vinte anos depois (pechouse no 86) e inicia unha nova andaina baixo a dirección de Ana Maria Moix. O orixinal é que creou un premio que vai ter un xurado unipersoal; desta volta será Eduardo Mendoza. Presentáronse 300 orixinais e fallarase o vindeiro mes de marzo e terá unha dotación de 12.000 euros. Tirou xa El faro, de P.D.James e El amante extremadamente puntilloso de Alberto Manguel e vai tirar Lukumi de Alfredo Conde en español. Dicíalles eu o outro día que Conde había publicar en Ediciones B, sabendo que o Grupo Zeta metera baixo ese selo todo o de Bruguera, mais daquela ignoraba que ían conceder unha segunda vida a Bruguera. O selo do gato negro recupera esa imaxe de marca e dedicará unha especial atención a autores que escriban en galego, vasco ou catalán.