UN XOGO DE APÓCRIFOS
Convídoos a unha gozosa lectura. Non soamente porque a miña inmodesta persoa acabe por ser o motor da maioría dos debates que nese lugar intentan establecerse, que tamén. Nomeadamente porque serve para analizar con eficacia as consecuencias de usar seudónimos en Internet. O meu único alcume na rede, espero que vostedes si me crean, foi sempre o meu primeiro apelido. O caso é que ese espazo é punto de encontro para persoas que se divirten insultándose as unhas ás outras e viceversa. Moitos deles teiman en que eu estou tras eses alcumes que usan para os seus embates e chegou un punto en que cada quen cre que estou tras os restantes alcumes (tras todos agás dos que usan eles mesmos, claro) e que me están acusando de rebentar un foro no que, cuitado de min, non participei alén de dúas ou tres veces e que non leo o que me gustaría por falta de tempo.