CUNQUEIRO EN 100 FOTOS

O selo sarriao Ouvirmos vén de editar unha fotobiografía de Álvaro Cunqueiro na que se fai un repaso á vida do escritor a través de cen imaxes tiradas do seu álbum persoal. O volume irá acompañado de dous discos compactos nos que reúnen gravacións do propio autor xunto con unha escolla de poemas seus musicados. Un texto de César Cunqueiro figura as primeiras das perto de duascentas páxinas que ten unha primeira parte dedicadas a un cento de imaxes que referencian momentos importantes da vida persoal do escritor mindoniense que van acompañadas de comentarios da profesora da Universidade de Vigo Rexina Vega, autora de varios estudos sobre a obra do mindoniense. A obra ten tamén unha parte sonora na que participa outra volta Rexina Vega analizando dúas gravacións realizadas ao narrador de Mondoñedo e que dan contido ao compacto ‘A palabra'. Outro dos discos está integrado por unha escolla de poemas de Cunqueiro que foron musicados, como é o caso de ‘Quen poidera namorala’, en versión de Luís Emilio Batallán; ‘A dama que ía no branco cabalo’ e ‘O cabaleiro da pruma na gorra’, cantada por Amancio Prada; ‘Polos teus ollos’, interpretada por Sete Saias ou ‘Con auga de sede vella’, revisitada polo viveirense Jei Noguerol.

Comments

[biscoitofino]

Gracias pola nova. Os adeptos, os que o consideramos un dos mais grandes (él sí era "bilingüe), non deixaremos de mercar o libro: estamos de noraboa.