PRECAUCIÓN OU MEDO CARA A REAL ACADEMIA GALEGA?

De Luns a Venres publica hoxe un inquérito sobre o xeito displicente que ten a Real Academia Galega de ignorar que haxa un número de mulleres representativo no seu pleno. O xornal comenta que se puxo "en contacto con varias figuras das nosas letras: académicos e non académicos, homes e mulleres de varias xeracións... e o silencio, por precaución, medo ou respecto, foi a resposta da maioría". A verdade, este país non deixa de sorprenderme. Non sei que me parece peor: se a precaución, o medo ou respecto. Disque esquecemos que é unha institución que financiamos todos e sobre a que debemos opinar para evitar que volva sernos algo alleo como aconteceu ata Del Riego lle virou o rumbo.

Comments

[manuel rodríguez]

O que acontece é que quen critica a cultura oficial, ben sexa a RAG, o Consello ou similares, queda en certo xeito excluído do circuíto oficial de congresos, cursos para profesores, publicacións subvencionadas que ninguén le... Por outra banda, criticar o mal funcionamento da RAG (que en máis de trinta anos de democracia foi incapaz de publicar un dicionario escolar decente ou mesmo unha gramática sinxela)é sinónimo de ser un mal patriota. Por iso, por atrás fálase, mais en público, pois procesión dos caladiños... Eu, por outra banda, non sei como unha institución como a RAG pode manter como académico correspondente de mérito a Francisco Franco, como se pode ver no portal desta institución na listaxe de académicos. Sería un proxecto proritario da RAG e da sociedade galega botar fóra a Franco...