BRIDGE

EU ESTABA NUNHA desas colas que deixan medrar os bancos diante dos mostradores para que lles fagamos parte do traballo por internet evitándolles uns custos laborais. Un vellote avisounos: «Pidan billetes novos, que Rodrigo Rato vai quedar con todos». Ao primeiro, tomeino a broma, pero a sensibilidade económica está tan vermella e tan supurante, que estiven por seguir o consello cando me tocase a quenda. Acordei do problema das pontes de Königsberg. Entre os científicos locais formulouse no século XVIII o desafío matemático de determinar se era posible atravesar as sete pontes que unían as illas do trazado urabano unha soa vez e regresar ao punto de partida. A dificultade estaba a rentes de perfilar unha saída á crise deixando que os bancos reparen sós os seus danos na liña de frotamento. A tentación arde en todas as cabezas expertas en economía. Pretenden quitarse a carga de sentir que o Reino de España é un protectorado alemán, polo que o ministro de Finanzas xermano, Wolfang Schaüble, pasa de cando en vez esixindo os libros de contabilidade para darlles un repasiño. Pode facelo nunha cidade tan humana coma Santiago e cubrilo co nome dun titán da remontada de catástrofes coma Konrad Adenauer, pero non houbo nin un murmurio humano nesa fiscalización. O matemático suízo Leonhard Euler chegou a Könisberg en 1741 e algúen lle presentou o encrucillado das pontes. Euler botou días e días fuchicando con esquemas. Demostrou que era irresoluble, pero serveulle para formular a importante Teoría de Grafos. Ese pode ser o itinerario.

Photo: Quezon Bridge (Manila, february 2012) Luke Arcellana