EUROVEGAS MEDRARÁ ENTRE FOLLAS DE PATACA
Unha clase de Secundaria chea de mozos. O profesor está explicando a autarquía. "Que condicións se precisan para que xurda unha ditadura?" Os rapaces van erguendo a man para solicitar quenda e achegando propostas. "Indignación", "Inflación", "Desilusión política", "Paro elevado",... Ao cabo levanta a man unha rapariga neohippie: "Patriotismo. Moitas bandeiras, como na última Copa do Mundo. Foi noxento". O paralelismo resulta obvio, non vou exercer didactismo cos clientes do Cabaret Voltaire. As condicións dánse no Reino de España. As evidencias comezan a agromar. A presidenta da cidade-estado de Madrid, Esperanza Aguirre, adiantou que, se un investidor co volume abondo -coma Sheldon Adelson- esixe un cambio normativo, o parlamento español acomodarase á reclamación. Nada que reprochar, os votantes armaron esta maioría absoluta disposta a renunciar á súa potestade. De precisarse, fumaremos en folla de pataca.
Fotografía: Shiegeichi Nagano