DESCABALGADO

A mañá de Aninovo amenceu tristeira, pero precisaba de encamiñar axeitadamente a bolsa que me pesaba no estómago, polo que saín andar Ribadeo. Nas Catro Calles atopei a Ibáñez. Non podo dicir que fose exactamente el, senón a elaborada parodia dun rapaz. Imitaba a estatua do fomentador do século XVIII que o Concello situou na casa consistorial. O home vestira a levita de cor azul Sargadelos sobre un chaleque vermello e uns pantalóns negros que baixaban ata media barriga da perna. Unha perruca e uns calcetíns de tenis reforzaban o escarnio. A estatua municipal ergue un brazo en xesto de fasquío mentres descende a escaleira do seu pazo. Ese aceno resume a permanente actitude do empresariado do país, canso de atrancos. Tanta dificultade acaba alimentando que os máis encendidos liberais sexan funcionarios que piden reducir o sector público con tanta convición coma os ribadenses miran a representación do seu vello emprendedor. O arrepiante é que a astracanada de Aninovo producíase no lugar no que tres séculos antes uns bárbaros descabalgaban a un Ibañez en fuga dos que se conducían a asaltarlle o pazo.

Photo: White horse at night in landscape de Johann S. Karlsson

(Artigo completo en El Progreso)