OS PERIODISTAS CÍTANSE EN BARES
Os periodistas reparten a vida entre lugares con barra e televisor estentóreo, e a redacción. A casa é un dormitorio para render o cansanzo durante unhas horas escuras. A falta dun acubillo confortable, cítanse nos bares. A min non me gustan os bares porque están cheos de señores e de señoras organizando cidades, reescribindo equipos de fútbol e detallando preguizosas paisaxes de caza e pesca. Pero Nacho Mirás citoume nun bar e non vou faltar. Levo tanto tempo admirando a distancia intelixente coa que moldea a realidade que conseguirá que entre nun bar e mesmo que me sobrepoña a miña timidez túzara para abrazalo coma se fose un irmán xemelgo do que me afastara unha guerra, un erro hospitalario ou o destino. Seguir o traballo dun profesional coa conmoción emocionada coa que o fago cos seus escritos alimenta unha confianza quente e doce que se impón á certeza de que nunca nos falamos en persoa. O encontro non vai ser hoxe nin mañá porque Nacho non pode, pero logo será.
Photo: Michael Kruse