CUSTE O QUE CUSTE

A Igrexa asume a rehabilitación da Virxe da Barca. Xa que logo, Feijoo amarra os cartos, pero o seu impostado "custe o que custe" quedou ecoando para a Historia. Son consciente do valor turístico e patrimonial do templo de Muxía. A responsabilidade sobre o ámbito relixioso, ao estar xestionado por un colectivo particular, debería ser allea ao público no que sobrepase unha subvención proporcional. Sabedor da importancia desta igrexa, entendo que nomeala cliente preferencial como fixo o presidente respondeu ao capricho de escribir un verso libre no seu medido soneto orzamentario. Algo grave cando moitos galegos teñen a misería por toda perspectiva de futuro. Non nos custará nada, seica. Mellor porque os cinco millóns de euros que aforrará o goberno coa xibarización do parlamento se precisan íntegros para atender necesidades de vida e necesidades de morte.