LO QUE NOS UNE
O enchepistas de hoxe vai ser un partido de fútbol entre os representantes de España e de Alemaña. Agradezo, logo, estar botando uns días nun país normal; no que reclaman ser representados pola súa selección. Este país é tan sensato que non soamente evita montaxes vergoñentas de pantallas xigantes na liña estética e monocorde da Praza de Oriente, senón que mira o fútbol por interese no deporte, sen exhibicionismos rojigualdas. Escoitaba onte, por un descuido no roldar da rosca do dial radiofónico, a un deses aletrados creadores de pensamento colectivo que estaba con papeiras o día no que explicaron no seu colexio que en español o 's' non se pronuncia 'j'. Aseveraba, cheo de razón, que "lo que nos une a los españoles por encima de las regiones (sic) y de las ideologías, es el fútbol". Non quedei co nome, pero vou negar que o argumento ilusionoume ao decatarme de que o material da fusión é un fato de deportistas profesionais.