ARDE O PARAÍSO DA TÚA INFANCIA

En Xornal: [O novo videoclip de The Arcade Fire, o que ilustra We Used To Wait, un dos cortes do celebradísimo terceiro disco dos canadenses, The Suburbs (Merge, 2010), está feito para cada un dos espectadores que se achegan a el. Dirixido por Chris Milk e aloxado de momento na web www.thewildernessdowntown.et, o vídeo interactivo esíxelle ao usuario que identifique o lugar onde se criou. Por que? Para ambientar todo o que virá a seguir, en varias xanelas do navegador –preferibelmente Google Chrome, para o que foi programado na linguaxe html5–, precisamente nesa paisaxe da infancia a través das imaxes de que dispón Google Street View. O resultado é un paseo personalizado e nostálxico polos lugares da infancia do espectador, tanto a vista de paxaro como a pé de rúa, ambientado pola música dos canadenses. Este domingo encabezarán no Monte do Gozo o festival gratuíto MTV Galicia.]