UNHA CARRAXE ARRASADORA
Rubalcaba pregunta a Rajoy ata cando pode aturar a sociedade esta situación. A pregunta é retórica porque o voceiro socialista sabe que a ira non é algo mensurable. Pero si unha forza descomunal. A cidadanía está irada, aniña unha carraxe arrasadora. Rajoy contesta cunha risa frouxa e chiscando un ollo no espasmo incontrolado de saberse incerto do que afirma. O presidente español cuestiona ao foro sobre se alguén pode reprocharlle incumprir as súas propostas de campaña. A ira non lle vai recoñecer mérito ningún, nin os que ten nin os que se atribúe. A súa arrogancia caracteriza aos perdedores habituais que gañan por fraqueza de adversario. Pero o seu adversario é poderoso, moito máis ca outros candidatos políticos. Son os candidatos da miseria.