DAVID MONTEAGUDO NEGA QUE AMENÁBAR LLE MERCASE 'FIN'

David Monteagudo destacou que varias produtoras lle fixeron ofertas para trasladar ao cine a súa novela 'Fin'. O escritor vivariense asentado en Cataluña manifestou a súa "sorpresa pola repercusión dun comentario 'en off'" que lle fixo "a un xornalista", no sentido de que chegara "a un acordo coa produtora de Alejandro"Amenábar, Himenóptero. Numerosos diarios cibernéticos e algunha axencia de prensa anunciaron a compra en firme en titulares, aínda que matizaban que "o escritor aínda non quere facer declaracións sobre este paso tan importante, xa que espera pechar o trato, que prevé que se faga de xeito inminente". Monteagudo recordou que o seu contrato co editor de Acantilado, Jaume Vallcorba, comprometía os dereitos para o cine, "polo que é el quen está a negociar coa produtora de Amenábar e coa de Celda 211". O novelista atribuíuse a filtración como "unha torpeza, porque non hai nada asinado". De calquera forma, o escritor dixo estar "interesado en participar no guión", como "cinéfilo" que asegura ser. Monteagudo non soubo aclarar se as negociacións que estaba a desenvolver o seu editor tiñan no outro lado á empresa de Amenábar ou ao produtor que colabora habitualmente con el, Fernando Bovaira, responsable de Mod Producións. Inclinábase por este segundo porque o director de 'Ágora' "afai rodar guións que escribiu el". A produtora de Celda 211, a coruñesa Vaca Films, negou que realizasen unha oferta, "aínda que si é certo que temos esa novela en estudo", desvelou Borja Pena, quen relativizó o seu interese no proxecto sinalando que "neste momento" teñen "sete ou oito novelas sobre a mesa". O produtor aludiu a que confeccionaran "varios informes sobre este libro, que nos mandou Cantil, e de momento témolo en 'standby'", afirmou con evidente escepticismo achegar das posibilidades fílmicas do libro. O éxito de 'Celda 211', que se estrea o mes que vén en Centroamérica e varios países europeos, fará que Vaca Films estude con detemento cada novo proxecto. Borja Pena reiterou que continúan tratando con Paul Haggis para facer un 'remake', no que supón que non traballará Luís Tosar, "porque nin a Haggis nin a Tosar vailles a interesar". Montegaugo está á espera de que o acordo fílmico chegue a plasmarse —"aínda que non se que pasará logo de filtrarse o de Amenábar", admite—.

Comments

[jaureguizar]

A min paréceme que a cousa está moi no aire, pero que o escritor se entusiasmou de máis.

[Rubén]

Xa está tardando algún fillo de Amenábar (J. J. Bayona, Oskar Santos...) en adaptar "Fin"; o mestre non creo que se moleste en ideas alleas que non estean á altura do seu xenio.