OS CLÁSICOS DE RÁBADE PAREDES

Lendo a Rábade Paredes, na páxina 108, puiden informarme dos autores clásicos aos que se refería cando ceibou aquilo. Nunha escea da novela, fálase de dous personaxes que se queixan de que os rapaces nunca leran nin lerán a "Poe, Mendiño e Códax, Manrique, Cortázar ou Torrente, nin a Otero, Manuel Antonio, Cunqueiro ou Rosalía". Afirma logo o escritor que "Paio e Tarnas xa leron moito a estes e len agora a Shakespeare e a Milton, a Joyce, a Beckett, por poñer algún caso, e non os chama O Código da Vinci". A escolma non está nada mal, aínda que eu non dou en vela axeitada para rapaces de instituto. O propio autor contéstase un pouco antes cando refire as lecturas do Quijote en español na escola.

"-¿E entendíades?

-Algo borroso, pero adiviñábamos.

Paio e Tarnas aborreceron sempre, por tramposa, a especie literaria chamada xuvenil, vaia palabra."