ESCRITOR, ESCRITOR, ESCRITOR E O MUSEO DE LUGO
Hai aínda un par de días que me volveron co ruxerruxe de que un escritor concreto ía ser director do Museo Provincial de Lugo. O escritor, ao que desculpen que non cite porque está farto de ser citado como candidato, rexeita tal candidatura (coma sempre fixo, por outra banda). Agora soa outro escritor como candidato dentro dunha terna da que se desbota a outro candidato que escribe Historia porque está xubilado e eu non vexo claro que o tercerio ternario vaia deixar o seu posto polo de director do MPL. Outro escritor, aí si que lle vexo lóxica pola súa experiencia eficaz, é anunciado como director de Publicacións. A todo isto, non comprendo para que teiman en nomear director, cando o museo leva case que unha década vivindo a mellor etapa da súa historia co cargo sen ocupar oficialmente.