ÁNGEL CURRÁS EVITOUSE SER MONSIEUR BOVARY

Ángel Currás decidiu evitarse o triste papel de Monsieur Bovary. Ser alcalde dunha cidade internacional coma Santiago debe de representar unha dignidade de ouro e lume sobre a que paga a pena permanecer sentado. Pero Currás entendeu que lle quedaba un ano ata as municipais e que o botarían á pira funeraria. Evitouse que o marchen. Feijoo actuou rápido, sacrifica unha peza maior, o segundo na sucesión. O presidente amarra Galicia. As augas do Manzanares baixan toldas e poida que nin Rajoy, capaz de aguantar nas peores condicións e coas peores baixezas, soporte o pago electoral da crise. Agustín Hernández é un dos nomes que non agardaba. Esperaba que lanzase directamente ao candidato cun ano de xestión a presentar e unha vantaxe na popularidade. Desconcertoume. Tanto como ese momento en que futuro de Compostela pareceu pasar por García de Loza.